Abdal Abdullayev

                   OLMADI

Əzəl gündən dərd çəkməyə yarandım
Sevinən şadlanan günüm olmadı
Nə qədər yalvardım qara bəxdimə
Amansız talehdən dönüm olmadı

 

Yanan arzuların söndü ocağı
Sənsiz qərib oldu vətən qucağı
Dəydi kürəyimdən dostun bıçağı
Mənə düşmənlərim qənim olmadı

 

Soldu gəncliyimin bağça bağları
Çəkildi sinəmə sevgi dağları
Qəmginəm ömrümün bədbəxt çağları
Təzədən başladı sonum olmadı

 

 

~~~~~~~~~~~~~~~~~~~~~~~~~~~

 

                 

                    KEÇİB

Yaxşılığ edəndə qaxırığ başa
Yaxşılığ bizlərə yamannan keçib
Yoncanın hörməti qalmayıb daha
Ulaq qış ötürüb samannan keçib

 

Adil zülmə gedir zalım əhv olur
Ya hakim səf düşür zaman səhv olur
Gümannan yaşıyan ölür məhv olur
Gümansız yaşayır gümannan keçib

 

Azdımı arada söz eyliyiənlər
Yandırıb bağrımı köz eyliyiənlər
Namusa qeyrətə göz eyliyiənlər
Siğə qardaş olur tumannan keçib

 

Ağıllar kir tutub vijdanlar paxır
Onçun başımıza ildırım çaxır
Cavanlar caz üçün süzülüb axır
Sazdan muğamatdan kamannan keçib

 

Payım günah oldu fitrəm savabsız
İndi çox suallar qalır cavabsız
Təməlsiz allahsız dinsiz kitabsız
Mömin şeytan olub imandan keçib

 

Qəmgin söz öyrənib hikmət soraxla
Gəzsəndə tapmazsan əldə çıraxla
Qoca tarixləri bir bir varaxla
Gör neçə dahilər cahannan keçib

 

 

~~~~~~~~~~~~~~~~~~~~~~~~~~~

 

 

 İki şairin eloğlunun məhəbbət yanğısı

 Sevgi dasdanı

 DÜŞDÜM

 

ŞAHLAR QƏRİBLİ:

Əzəldən mənimki heç gətirmədi
Nəhs olan aylara illərə düşdüm
Bir eşqin ucunnan nələr çəkmədim
Gəzdim məcnun kimi çöllərə düşdüm

 

ABDAL QƏMGİN:

Əl üzmədim sevdiyimin əlindən
Əlimdən tutmayan əllərə düşdüm
Vurdu qafil məni dosdun namərdi
Yüz min fitnələrə fellərə düşdüm

 

ŞAHLAR QƏRİBLİ:

Ömür yarı oldu ağartdım başı
Güldü bu halıma anlamaz naşı
Heç vaxt qurumadı gözümün yaşı
Özüm göz yaşımda sellərə düşdüm

 

ABDAL QƏMGİN:

Gəncliyimin dadı qaldı nə duzü
Qış olan könlümün açılmır buzu
Aldılar əlimnən sevdiyim qızı
Beş il qərib qürbət ellərə düşdüm

 

ŞAHLAR QƏRİBLİ:

Qırılmadı bu həsrətin inadı
Yaralarım sağalmadı qanadı
Qəribli Şahları çoxu qınadı
Ağızdan ağıza dillərə düşdüm

 

ABDAL QƏMGİN:

Qəmginəm dərd adlı bir qala yapdım
Sökdüm ilmə ilmə ömrümü çapdım
Sonunda bir ürəy ağrısı tapdım
Dilnən ağlanası hallara düşdüm

 

 

 

~~~~~~~~~~~~~~~~~~~~~~~~~~~

 

 

      

                     KEÇİB

Uçub zirvələrə şair xəyalım
Neçə dağ dolanıb dumannan keçib
Gəzirəm tapmıram itirdiyimi
Kəsilib umudum gumannan keçib

 

Talehim çaş baxdı çaş ötdü getdi
Saç sakqal ağardı baş ötdü getdi
Hayıf cavanlığa yaş ötdü getdi
Sən görən devrannan zamannan keçib

 

Qəmgin məhəbbətdən çoşdu çağladı
Nakam sevgisinə dasdan bağladı
Ömür başa yetdi əcəl haxladı
Daha yalvarmaxdan amannan keçib

 

 

 

~~~~~~~~~~~~~~~~~~~~~~~~~~~

 

 

      

ƏZİZİM

Qartal vurulsada yenə qartaldı
Şöhrəti zirvədən enmir əzizim
Əsil aşiqləri yandırib yaxır
Məhəbbət atəşi sönmür əzizim

Xəyalnan uyuyub dərtlə durmuşam
Ömrün yarısını başa vurmuşam
Baxmaki ayrı bir həyat qurmuşam
Ürəyim yenədə dönmür əzizim

Qəmginəm dərd xanəsinə quruldum
Əzablara göz yummaxdan yoruldum
Xain dosdun gülləsinnən vuruldum
İncidir ağrısı dinmir əzizim

 

 

 

~~~~~~~~~~~~~~~~~~~~~~~~~~~

 

 

 Qeyrətsiz 

Söz gətirib söz aparıb
Ara vurursan qeyrətsiz
Vijdanını pula satıb
Para vurursan qeyrətsiz

 

Fərsiz ata naqis baba
Söyürsən yediyin qaba
Ağlın çaşır gah mizraba
Tara vurursan qeyrətsiz

 

Gədalıxdı varın yoxun
Zaydı kökün bijdi zoğun
Anlıyarsan peysər yoğun
Hara vurursan qeyrətsiz

Dilin qandı sözün qada
Yerin yoxdu bu dünyada
Utanmırsan təmiz ada
Qara vurursan qeyrətsiz

 

Sən qəmgini etmə fikir
Adım sanım düzdü şükür
Mənniyinə balta çəkir
Yara vurursan qeyrətsiz

 

 

 

~~~~~~~~~~~~~~~~~~~~~~~~~~~

 

 

Bilər

Aşiq pərvanədir sevgisi şəmdir
Alışıb oduna yananlar bilər
Məcnunun leylanın nə çəkdiyini
Fərhadı şirini qananlar bilər

 

Məhəbbət ürəyi ürəyə bağlar
Təlatüm eyləyir sel kimi çağlar
Kərəm nalə çəkər əsli qan ağlar
Tərsanın dərdini sənanlar bilər

 

Qəmginəm gəncliyi vermişəm bada
Ömür yollarımı tutdu qan qada
Sevgi əzabını qoca dünyada
Mənim tək ürəyi sınanlar bilər

 

 

 

~~~~~~~~~~~~~~~~~~~~~~~~~~~

 

 

 

OLARMI

Cənnətə bənzəyir behiş bağıdır
Gəlim qucağında ölüm olarmı
Bülbül həsrət çəkir bahar çağıdır
Qoynun çəmənzardı gülüm olarmı

 

Sevgini satmayağ söhbətə sözə
Yandır nəfəsinlə atəşə közə
Bir aylı gecədə baxağ göz gözə
Toxunsun əlinə əlim olarmı

 

Xatirin hörmətin əzizdir canan
Sevgi əsirgəmə qəlbi yanannan
Dil açım istəyim ata anannan
Özüm elçiliyə gəlim olarmı

 

Qəmginəm qayıt gəl ötdü devranım
Haradasan ay mənim sevgi sultanım
Kərəmtək eşqinlə yanım odlanım
Sovrulsun göylərə külüm olarmı